【捷克啤酒之旅】
8 月嘅捷克啤酒之旅，由上次講到酒店樓下士多買返嚟嗰罐 Svijany 展開。飲完又上網了解吓捷克啤酒嘅歷史。原來最常見到嘅金黃色啤酒－Pale Lager 淡窖藏啤酒，即 Carlsberg、Heineken 出產嗰啲，就係發源於現今捷克境內 Pilsen 市，所以 Pale Lager 又稱為 Pilsner 啤酒。
其實嚴格嚟講係德國人首先嘗試將 Pale Ale 釀製技術應用喺傳統 Lager，不過最後由捷克酒廠 Pilsner Urquell 成功以此釀製出透明金黃色、口感清爽、酒質穩定的 Pale Lager。世界各大酒廠旋即效法其製法，奠定現代啤酒口味。
本身知道捷克出好多得獎啤酒，再加上呢份歷史，梗係要日日都飲返幾杯啦。早午餐三餐，加下午茶消夜都要叫返杯。有時早餐消夜唔喺出面食，就靠喺士多入定嘅存貨。
到訪捷克嘅第二日，我哋就去咗童話城堡小鎮 Cesky Krumlov。食晏時，餐廳提供不同啤酒，眼花撩亂。梗係問問侍應有咩推介啦。佢斬釘截鐵提議當地酒廠 Eggenberg 出產嘅傳統捷克黑啤。
聽到黑啤，可能有人同我一樣以為係 Guinness 嗰種 Stout。細個開始飲啤酒時，香港超市黑啤選擇唔多，最大路就係 Guinness。而我就唔係咁好 Guinness 嘅，一直對黑啤印象麻麻，自然平時都好少搵黑啤嚟飲。
但原來 Eggenberg 嘅黑啤係 Dark Lager，即係未發明金黃色 Pale Lager 前嘅傳統 Lager。我一試：「嘩～好好飲呀！」然後就咕咕聲一口氣飲咗大半杯。味道比 Pale Lager 味道更濃麥汁味，多份甜味又不減清爽感覺，啱晒我口味！簡直帶領我踏進啤酒嘅新大陸。
喺餘下嘅旅程，只要間餐廳或酒吧有黑啤我就一定叫，完全捨棄咗黃金啤。不過，有時無得揀，飲杯黃金都係爽嘅。行到邊，飲到邊，行城堡行到口乾又喺檔攤整返罐。爽呀！
返翻 Prague 後嘅最後一晚，我哋就去咗一間歷史悠久，當地最著名嘅酒吧 — U Fleků。呢間酒吧開業於 1499 年，五百幾年嚟一直自家釀製傳統 Dark Lager，亦係全店唯一提供嘅啤酒。
第二朝一早就出機場，喺便利店啱啱好用晒啲散銀買多罐黑啤。本來打算邊飲邊等上機，最後都係決定唔飲住。因為平時唔覺有捷克黑啤，所以都係帶返瑞典慢慢回味。
總結我今次飲過嘅啤酒廠，記得嘅有 Bernard、Budweiser Budvar、Eggenberg、Kozel、Svijany、Pilsner Urquell、U Fleků。捷克之旅完結後，買親啤酒都會睇吓有冇捷克黑啤，可惜選擇少之又少呀！捷克黑啤絕對值得一試，大家有機會都試試啦～ 乾杯！
Search